بمناسبة تنصيب ترامب رئيسا لاميركا: القافل قافل

القافل قافل حتى لو الله ينزل له معجزة:
 ينتخبون رئيس اسود ، نصفـﮓ و نهوس و نتلوّﮒ و نردح و نـﮕـول ماعدهم عنصرية أحسن منا ، طاح حظنا...ينتخبون ابيض عنصري كلب ابن كلب ، نصفـﮓ و نهوس و نتلوّﮒ و نردح و نـﮕـول شحلاتهن مرته و بنته ، طاحظنا...ينتخبون واحد "عاقل" ، نصفـﮓ و نهوس و نتلوّﮒ و نردح و نـﮕـول ناس تفتهم ، طاحظنا... ينتخبون مسودن ، نصفـﮓ و نهوس و نتلوّﮒ و نردح و نـﮕـول هذا الراح يصفيها ، طاحظنا...
 ينتخبون نعال ما يسولف بالدين ، نصفـﮓ و نهوس و نتلوّﮒ و نردح و نـﮕـول خو مو جماعتنا ، طاحظنا...
 ينتخبون نعال يخرط شـﮕـال الرب و شحچـى يسوع ، نصفـﮓ و نهوس و نتلوّﮒ و نردح و نلبس الچـزمة و نشبخ شبخة أم المتر و نعبر و نغلّس و نـﮕـول احنا المسلمين ارهابيين ، طاحظنا...
 حتى المطي الأثول من تسأله ، هم راح يطلع يعرف منو اللي أسس و دعم الإرهاب من ايام افغانستان و قبلها ، و يا دولة اللي تريد المنطقة تتقسم .. و حتى المطي الغبي (الغبي .. مو ذاك الخابصينا بيه اليندل الدرب من اول مرة) هم يعرف بأن بأيام جده المطي الاكبر قبل 100 سنة هم چـان اكو إسلام و مسلمين بس الإرهاب ما ظهر إلا بأيام المطي ابوه و اللي عاصر 3 احداث: صعود امريكا بعد الحرب الثانية ، ظهور النفط بالسعودية ، و تأسيس اسرائيل ، و الحدث الرابع ظهور سلالة محسنة من المطاية و ما هم بمطاية .. و يستغرب ليش هذا الشي الواضح اكو مخلوقات من غير ذوات الأربع ما تريد تقتنع بيه لأن عاجبتها الطربـﮕـة و الزرق ورق و نسوان الغرب (سودننهم امهات سيقان .. خلنهم يفقدون) و عدهم عقدة الدونية المزمنة و هاي ما يفيدها كبسول و لا ابر و لا تحاميل...
دكافي عاد ارحموه للنعال مو تـﮕـطّع من ﮔد ما تضربون نفسكم بيه .. كافي لعبتوا نفسنا...
 و الياخذ على روحه خل ياخذ على روحه ، و اللي يـﮕـول بسيم ﮔام يضرب شامي عامي تالي الليل عنده خيار الحذف ، و ما احلى من الحذف إلا البلوك بنكهة الفراولة ، عود لا يقصّر و حق هي إيفانكا المخروع بيها ... إن شاء الله يوم التطلع دراسة تـﮕـول احنا لا عرب و لا عجم و لا بشر ، و العراق مو عراق و 58% من جيناتنا صراصر و احنا المسلمين إرهابيين متوحشين نذبح مسيحي عالغدا و صابئي عالعشا و نسوي فواتحهم مادري عزياتهم بحسينياتنا و جوامعنا حتى نحتويهم و نتنمر عليهم ما ادري حتى تجي دجاجة اسطورية تبيض لنا ذهب ، و بالحسينية نذبح بزازين و نشرب دمهن ، إن شاء الله تطلع هيـﭺ دراسة و تتحزمون مثل زيزي مصطفى و ترﮔصون وهم مو اكيد ، لو تفوخون لو لا.....)
معاني بعض المفردات للأصدقاء غير العراقيين:
طحظنا " طاح حظنا" = تبا لنا أو ما شابه ذلك !
نتلوّﮒ = ننافق أو ما ...الخ
مسودن = مجنون ، مخبول 
يخرط = يخلط أو يهذي 
المطي وجمعه مطايه = الحمار تحديدا بالعراقية ، و كل ما يمتطى بالفصحى.
شحكى = أيش حكى .. ماذا قال.
الطربكة =الضجة .
دكافي = كفى !
يسولف = يحكي ويروي ويقص 
ياخذ على روحه = يشك بأنه مقصود بالكلام
بزازين = قطط
هيج = هيك ، هكذا
تفوخون = تشعرون بالارتياح. 

Tags